اهلي بقلم اماني سيد 1

أهلي كانوا عندي، وبعد ما قعدوا معايا شوية، جه وقت إنهم يمشوا، فأخو جوزي عرض عليهم يوصلهم بعربيته. أنا وقتها ماكنتش أعرف إن اللحظة دي هتفضل محفورة في حياتي بالشكل ده. نزل يوصلهم، وبعدها بساعات قليلة جالي خبر. أخو جوزي توفى. وأهلي كمان توفوا في نفس الدــ,,ـــــادث. الخبر نزل عليّا كأنه صدمة كسرت كل حاجة جوايا مرة واحدة… خسرت أهلي، وخسرت في نفس الدــ,,ـــــادث أخو جوزي، وبدل ما ألاقي حد يسندني، لقيت مراته بتحملني مسؤولية كل اللي حصل.

من أول يوم وهي بتبصلي بنظرة مليانة غضب، وكل ما تشوفني تقول: إنتِ السبب… لو أهلك ماكانوش عندك، جوزي ماكانش نزل يوصلهم. كنت بحاول أسكت، وأقول لنفسي إنها موجوعة ومش مستوعبة الصدمة. لكنها ماوقفتش. كل مرة يحصل بينا كلام كانت ترجع لنفس الجملة، وكأنها قررت تحط كل غضبها فوق رأسي. والأصعب إنها كانت تدعي عليّا وعلى ولادي.

كنت أرجع أوضتي وأبكي في صمت، وأنا أصلًا لسه مش مستوعبة إن أبويا وأمي ماتوا، ومش قادرة حتى أعيش حزني زي أي إنسانة فقدت أهلها. وبدل ما حماتي توقف جنبنا وتفهم إن دي مصيبة اتأثرت بيها عيلتين، بدأت هي كمان تتأثر بكلام مرات ابنها. بقت تعاملني بقسوة، وتلومني بطريقة غير مباشرة، وأحيانًا كنت أسمع كلامًا يجعلني أشعر وكأنني ارتكبت خطأ كبيرًا.

وكانت تطلب مني أنزل أنضف لها الشقة، بحجة إنها تعبانة ومحدش واقف معاها في تربية أولادها. كنت أقول لنفسي: “هو أنا اخترت إن الدــ,,ـــــادث يحصل؟ هو أنا كنت أعرف إن أخو جوزي هيمــ,,ـــــوت؟” لكن محدش كان بيسمعني. مرت فترة وأنا ساكتة، أحاول أتحمل، وأحاول أحافظ على بيتي، خصوصًا إن جوزي نفسه كان حزين على أخوه. وبعد فترة، بدأت مرات أخوه تضغط على حماتي.

قالت لها إن جوزي لازم يبقى مسؤول عنها وعن أولاد أخوه، وإنه بما إنه أخوهم الوحيد، يبقى من حقهم يعتمدوا عليه في كل حاجة. حماتي وافقت. وأنا لما عرفت، ما اعترضتش. قلت لنفسي إن دول أولاد أخوه، وإن جوزي أكيد مش هيسيبهم محتاجين، وممكن يساعدهم على قد استطاعته. لكن اللي حصل بعد كده كان أكبر بكتير.

في يوم، حماتي قعدت مع جوزي وقالت له بمنتهى الحسم: مرتبك من الشهر الجاي هيروح لمرات أخوك، وهي اللي هتمسك مصروف البيت، لأن الفلوس اللي بتديهالها مش بتكفي، رغم إنها بتاخد جزء كبير من مرتبك. بصيت لجوزي وأنا مستنية رده. لأول مرة حسيت إن الموضوع مش مجرد مساعدة لأرملة وأطفال. دي كانت محاولة إن حد تاني يمسك بيتنا كله في إيده.

وحماتي حطت استقرار جوازي ورضاها في مقابل الاستمرار في دعم مرات أخوه. عدى شهر على الأحداث دي، وهي فعلًا مسكت المصروف كله، وبقت تسيب لنا جزء بسيط منه. لكنها ما اكتفتش بكده. بقت تكلم جوزي وتناديه بحجة إن الأولاد محتاجينه وإن عندهم مشاكل، وكان ينزل عندها ويتأخر، ويرجع متغير ومتوتر، والوضع بينا اتقلب تمامًا.

بقى جوزي يطلب مني أنزل أنضف لها الشقة، وهي تجيب الخضار وأنا أطبخ وأبعت لها الأكل جاهز. ما بقيتش عارفة أوفر لأولادي احتياجاتهم الأساسية، رغم إن جوزي كان بيجيب لأولادها أحسن الحاجات، وليها هي كمان. ما بقيتش عارفة أعمل إيه، ولا لاقية حد من أهلي أشكيله. لحد في يوم، طلبت جوزي ونزلت وراه، وكانت هي سايبة الباب موارب.

قصدت إني أشوف، ولما بصيت لقيتها قاعدة جنبه وبتقوله: بقولك إيه، عدى شهر دلوقتي على جوازنا، وعدى ست شهور على وفــ,,ـــــاه أخوك، وجه الوقت إنك تنفصل عنها، أنا مش طايقة أشوفها هنا. وقتها جوزي كان بيحاول يطمنها وبيقول: نكمل بس السنة عشان محدش يتكلم، وأنا هرتب كل حاجة، وأجهز لك الشقة وأضم الشقتين لبعض، وأعيشِك في أحسن حال. حسيت وقتها إن الأرض بتلف بيا.