ليله واحده

في صباح يوم جديد، قاموا على صوت خبط جامد على الباب. نسيم قالت بخوف إيه ده؟ عاصف قال بسخرية أه عليا تار وبيستأذنوا علشان ياخدوه. هروح أفتح لهم. وقف ولبس قميصه وفتح الباب. اتنهد بضيق لما لقى نفين في وشه. قال يا نفين، الساعة كام دلوقتي؟ نفين بصت لنسيم بغضب وقالت بسخرية ناموسيتك كحلي يا عريس الساعة حداشر.

وبصت لنسيم وقالت قومي فزي يا بت حضريلي الفطار. نسيم قامت بسرعة ناحية الدولاب. عاصف قال ما البيت مليان خدم يا نفين ممكن أي واحدة تحضرلك الفطار. نفين قالت ودي تفرق إيه عن الخدامات اللي تحت؟ أنا عايزاها هي. نسيم كانت بتربط النقاب ولسه هتمشي، عاصف مسك إيدها وقال البنت دي مش هتتحرك من هنا هتفضل هنا لحد ما نتأكد إنها حامل. إحنا دفعنالها علشان كده مش علشان تخدم.

نفين قالت بدهشة يا سلام وإيه المانع إنها تخدم لحد ما نتأكد؟ ولا إنت عجبتك ست الحسن؟ عاصف بص لنسيم وقال جدا وتعجب أي حد. نسيم اتسعت عينيها من كلامه. نفين اتصدمت وقالت بغضب بتعاكسها قدامي كمان يا عاصف؟ عاصف قال ببرود لو مش عاجبك، براحتك. نفين اتغاظت جدًا ونزلت. نسيم قالت إنت عملت إيه؟ روح صالحها، افرض مشيت.

عاصف قال ولو مشيت؟ هو اللي خلقها مخلقش غيرها. نسيم قالت بدهشة إنت بتقول إيه؟ لو كل واحد قال على مراته كده محدش هيفضل متجوز. إنت مش بتحبها؟ عاصف ضحك بسخرية وقال أحبها؟ إنتِ غلبانة قوي. جوازي من نفين جواز اجتماعي مش أكتر. وحكى لها عن سبب زواجه منها ومصالحه القديمة. نسيم كانت بتبص له بدهشة وقالت عاصف باشا هقولك كلمتين ورزقي على الله. عاصف قال انجزي بس.

نسيم قالت بهدوء إنت واطي وانتهازي وحقير ووصولي. عاصف رفع حواجبه بدهشة، لكنه ضحك وقال عارف بس عمر ما حد قدر يقولي كده. وخرج من الأوضة. بعد شوية كان عاصف بيفطر مع أمه، ونسيم بتفطر معاهم. سلوى قالت مقولتليش يا عاصف مراتك زعلت ليه؟ عاصف قال أبدًا غيرة حريم وأنا معنديش خلق للكلام ده. سلوى ابتسمت وقالت أنا كمان جهزت أوضة لنسيم علشان ميبقاش فيه مشاكل.

عاصف شرق بالمية وقال بسرعة نسيم مش هتروح مكان لحد ما نتأكد من حملها هتفضل معايا، والنقاش ممنوع. سلوى ضحكت وقالت ليه؟ مش إنت اللي قولت مش عايزها معاك؟ عاصف قال ماما خليها معايا علشان متشتغلش ولا تتعب في حاجة، مش أكتر. طلع بسرعة. سلوى بصت لنوجه وقالت تفتكري فيه أمل؟ نوجه ضحكت وقالت أنا عمري قولتلك حاجة خيبت يا ستي؟ الست نسيم دي أدب وجمال، وده أكيد هيغيره. سلوى قالت نوجه ده ابني.

نوجه ضحكت بهزر معاكي يا ستي. عند عاصف، كان قاعد بيشتغل على اللاب، ودخلت نسيم. قال ماما كانت بتقولك إيه؟ نسيم قالت هتقول لي إيه يعني؟ عاصف قرب منها وقال أنا محدش يقدر عليا بس إنتِ بتعرفي توقفي قدامي. نسيم بصت له وسكتت. وبعد لحظة قالت لو سمحت، ملوش لزوم الكلام ده. عاصف قال ليه؟ خايفة؟ نسيم قالت وهخاف من إيه؟ عاصف قال خايفة مني؟