اخويا ببتصرف تصرفات غريبة 1

اخويا بيتصرف تصرفات غريبه ج 1 اخويا بيتصرف تصرفات غريبه بتحسسني انه بيبص لمراتي ، ومراتي وامي بيقولولي اني موهوم وشكاك بس انا مش قادر اتخطى الموضوع وروحت سألته من غير اي تمهيد بس اللي قاله وقتها دمرني حرفيا، ده لو كان قال ان شكي في محله كان اهون بكتير من اللي قاله !!!

مش عارف أبدأ منين او اجيبها ازاي ، أنا اسمي شريف، اتجوزت وعايش في بيت العيلة اللي اتربيت فيه، معايا في البيت أمي ست كبيرة ومريضة، وأخويا سمير اللي أصغر مني، عنده ٢٥ سنة. من يوم ما اتجوزت ودخلت مراتي "منة" البيت ده، وأنا حاسس إن في حاجة مش طبيعية، حاجة بتكتمني وتخليني مش عارف أتنفس. كل حاجة بدأت بنظرات.. نظرات من أخويا لمراتي مش قادر أستوعبها ولا أهضمها.

أوقات ألمحه باصصلها بطريقة غريبة، عينه معلقة عليها ومش راضي ينزلها حتى لو البيت مليان ناس وقاعدين كلنا مع بعض! ولما نخلص أكل، ألاقيه بيجري بسرعة عشان يشيل معاها الأطباق ويدخل معاها المطبخ، ويبقى باين عليه إنه مبسوط بشكل يرفع الضغط. وحتى لما يجي ينام، يقولها "تصبحي على خير" بطريقة مريبة، فيها نبرة بتخليني أغيلي من جويا وأحس إن دمي بيتحرق.

المشكلة إن أمي تعبانة جداً وطريحة الفراش معظم الوقت، وكنت بضطر أطلب من منة تنزل تساعدها وتخدمها، وبدل ما أكون مرتاح إن مراتي بتساعد أمي، كنت بكون قاعد على نار. في الأول، حاولت ألمّح لمراتي وأفهم منها، حكيت لها الموقف وقلت لها بصراحة: "هو إيه حكاية سمير؟ ليه بحس إنه معلق معاكي زيادة عن اللزوم؟". مراتي استغربت وقالتلي: " يعني إيه زيادة عن اللزوم؟ إزاي يعني؟ ".

قلت لها بضيق واضح: "معرفش، طريقته معاكي مش مطمناني خالص، وتصرفاته مريبة.. ياريت تتجنبيه ويكون ده أفضل للجميع". ضحكت كأني بقول نكتة وقالتلي: "إنت اللي موسوس زيادة عن اللزوم يا شريف، ده أخوك الصغير!". سكتّ وقتها ومحبتش أتهم أخويا بحاجة زي دي من غير دليل قاطع، وقلت يمكن أنا فعلاً ببالغ. بس الوضع ما وقفش هنا. في يوم، كانت منة قاعدة بتشوف فيلم هي وأمي تحت في شقة العيلة، وأنا كنت في الشغل.

رجعت بدري وفتحت الباب بالمفتاح بالراحة زي عادتي، وشفت مراتي قاعدة بتضحك على الفيلم هي وأمي، وأخويا سمير بيحاول يقرب منها واحدة واحدة وقاصد يقعد جنبها بالظبط. أول ما قرب أكتر، أنا كحيت بصوت جامد رنّ في الصالة.. أخويا اتنتر من مكانه ووقف بسرعة ووشه أصفر. أنا أتعصبت جدا، ناديت على منة واتخانقت معاها بعصبية من غير ما أفهمها الأسباب، وقلت لها بصوت يرعب: "تخلصي شغلك تحت وتطلعي شقتك فوق فوراً ومشوفكيش نازلة تاني!

".منة قعدت تعيط من عصبيتي عليها وهي مش فاهمة في إيه أنا نزلت لأمي في أوضتها عشان أفرغ اللي جويا، قعدت جنبها وقلت لها: "هو مال ابنك يا أمي؟ مش مظبوط ليه؟". أمي بصتلي باستغراب وقالت: "إزاي يعني يا شريف؟ مال أخوك؟". قلت لها : "الولد ده بيبص لمراتي بطريقة غريبة وتصرفاته مش تصرفات أخ مع مرات أخوه أبداً!". أمي ضربت على صدرها وبصتلي بخضة وقالت: "إنت اتجننت يا شريف؟! ده كلام تقوله؟

! معقولة أخوك الصغير هيبص لمراتك؟! اتعوذ من الشيطان يا بني". اتنهدت بقلة حيلة وقطعت الكلام، وشفت إن مفيش فايدة.. الكل شايف إن أنا اللي موسوس ومريض ومجنون. تاني يوم الصبح، كنت نازل عشان أمشي على شغلي، ولقيت أخويا راجع البيت ومقرب مني وماسك كيس، وطالع منه جلابية حمرا بيتي، ضيقة ومفتوحة! اتصدمت وسألته بذهول وحيرة: "إيه دي؟ ومين دي اللي جايبها لها؟". رد عليا بكل بساطة وابتسامة: "دي لمنة مراتك.

. إيه رأيك فيها؟ هتبقى تحفة عليها جداً!".الدنيا لفت بيا، وبصيت للجلابية بغضب مش قادر أسيطر عليه، مسكتها ورزعتها في الأرض بشدة، وشديته من إيده وطلعت بيه فوق السطح بعيد عن عيون البيت كله. وقفت قدامه وقلتله بعصبية وبدون أي مقدمات: "إيه حكاية منه معاك؟! نظراتك ومعاملتك ليها مش معاملة واحد لمرات أخوه أبداً!