بيت دورين 2

انا وضرتى ٢ هند ماضيعتش وقت في عياط أو كلام ملوش لازمه.. فهمت كويس إن طاقتها خسارة في الأشكال دي، وإن الحق ما بيرجعش بالصويت، الحق بياخده صاحبه بالقانون. فتحت دولابها بهدوء، وطلعت غويشة ذهب من اللى كانت شيلاها للايام ، ونزلت بيها على الصاغة باعتها فورًا عشان تدفع أتعاب المحامي الشاطر اللى هيرجع لها حقها .

راحت هند لمكتب المحامي، وحكت له كل تفاصيل اللي حصل من شعر وتعدي، وسكتت عن كل استفزازات شريف وولاء، وطلبت منه طلب واحد حاسم: — أنا عايزة أرفع قضية طلاق للضرر، وفى نفس الوقت، أخد قرار تمكين من شقتي اللى متجوزة فيها و حقي فيها، وعايزة باب شقة يقفل عليا وعلى بنتي عشان القرارات دي تتنفذ صح.

المحامي سمعها وهو مندهش من ثباتها وقوتها، وقال لها بثقة: — اطمني يا مدام هند، حقك راجع راجع، وبكره القانون هو اللى هيخليكي تضحكي. بدأ المحامي إجراءات القضية وقرار التمكين بسرعة ، وما هي إلا أيام معدودة، وبفضل ثبات هند وإصرارها، طلع قرار التمكين الرسمي من النيابة بتمكين هند من شقتها في الدور الأول، ورفض أي تعرض ليها من شريف أو مراته الجديدة.

وفعلاً، في يوم تنفيذ القرار، نزل مع هند قوة من تنفيذ الأحكام ومعاهم محضرين، ومعاهم نجار شاطر اشترت هند باب شقه والنجار بدا يركبه وقفت هند راسها مرفوعة ومستندة بظهرها على الحيطه بكل ثقة، وشريف وولاء كانوا واقفين فوق فى الدور التاني مذهولين ومش مصدقين عيونهم والدم بينغلي في عروقهم. هند شاورات للنجار وقالت بصوت قوي وواضح سمع الكل: — اتفضل يا أسطى، ركّب باب جديد للشقة.

. باب صلب ومتقفل، ومن النهاردة.. مفيش مخلوق يقدر يدخل هنا تاني غير بإذن القانون. النجار بدأ يركب الحلوق والباب الخشب المتين، وكل طرقة شاكوش كانت بتنزل على قلب شريف وولاء كأنها صاعقة، وهم شايفين إن هند رجعت ملكة في بيتها، ومبقاش للكلاب الضاله طريق عليها ولا على بنتها. رغم إن قرار التمكين وباب الشقة الجديد رجعوا لها جزء كبير من امان مكنتش حاسه بيه ، إلا إن نــ,,ـــــار القهر اللي جوه قلب هند ما كانتش طفت.

. هي ما كانتش ناوية تكتفي بالقانون وبس، كانت واخدة عهد على نفسها إن القلم اللي أكلته لازم تردّه لولاء وبنفس الطريقة، عشان تذوق نفس الكاس وتعرف إن سكات الست مش معناه ضعف، ده كان هدوء اللي بيجهز للضــ,,ـــــربة القاضية. وفعلاً، فضلت هند مراقبة تحركات ولاء، وعارفة جدولها بالظبط. لحد ما جه اليوم الموعد. في وقت الصبح، وكان شريف نازل لشغله، ولاء نزلت من الدور التاني رايحة تجيب طلبات للبيت وهي حاسة بزهو وغرور وماسكة موبايلها.

وأول ما وصلت عند مدخل الدور الأول، لقيت هند واقفة في وشها فجأة وبكل هدوء وبرود قالت لها بصوت حاسم: — رايحه فين يا ولاء؟ استنى.. أنا عايزاكي في كلمتين تعالا ولاء بصت لها بسخرية وقالت: — خير يا قرعة؟ جاية تاخدي العزاء ولا إيه؟ ابعدي عن سكتي احسن أنده لشريف يربيكي من جديد! قبل ما ولاء تستوعب، كانت هند اتحركت بسرعة البرق وبقوة جبارة ناتجة عن شهور من القهر والظلــ,,ـــــم.