ليلة مولد النبي حكايات زهرة

طاهر كان عنده ظروف زمان! نهى صحتها تعبت وراحت قعدت عند أهلها بالولد، ولما أنتِ اتجوزتيه خفنا نقولك عشان ما تحطيش في بالك وتعملي مشاكل! سمعت الكلام ده، وما لقيتش غير ضحكة هستيرية تطلع مني يعني أفهم من كده.. إن العيلة كلها كانت عارفة؟ وأنا الوحيدة المغفلة اللي بتمثلوا عليها....طب اقدر افهم بتعملو ايه في شقتي اللي اشترتها بشقايا نهى ردت بتناحه .

...عادي بيتنا على قده خالص وده عيد ميلاد ابني ومحتاجين مكان مناسب ضحكت وأنا ببص لنهى وبعدين لطاهر عشان كده بقى... من وقت ما اتجوزنا وإنت وأمك بتوزعوني ليلة المولد! عشان توافق يوم عيد ميلاد ابنك اللي بتحتفلوا بيه في شقتي... حاجة عظيمة خالص. طاهر قرب مني وقال بتوتر زهرة، الموضوع مش مستاهل كل ده، وبعدين دي أمي وابني ومراتي... قاطعته وأنا بضحك بمرارة مراتك؟

أهو أخيرًا قلتها بنفسك. سكت. قربت منه خطوة بس في حاجة نسيتها يا طاهر... الشقة دي مش شقتك. بص لي باستغراب. يعني إيه؟ رفعت راسي وقلت بكل ثقة يعني الشقة دي أنا اللي شاريها من فلوس شغلي، وكل جنيه فيها أنا اللي تعبت فيه. لا إنت دفعت فيها جنيه، ولا أمك، ولا نهى. حماتي اتدخلت بسرعة يا بنتي ما إحنا عيلة واحدة!

بصيت لها وقلت العيلة الواحدة بتستأذن قبل ما تدخل بيت بعض، مش تستنى صاحبة البيت تخرج منه عشان تعمل حفلة جواه. نهى اتوترت وقالت أنا والله مكنتش أعرف إن الشقة باسمك. بصيت لها وحتى لو مكنتيش تعرفي، دلوقتي عرفتي. وبعدين بصيت للكل وقلت الاحتفال خلص. طاهر حاول يهديني زهرة، الناس دي ضيوف. ضيوف مين؟ وأشرت للباب الضيوف يتعزموا بإذن صاحبة البيت.

إنما إنكم تدخلوا شقتي وتعملوا عيد ميلاد وتجيبوا ناس وتجهزوا أكل، وأنا أكون بره البيت بأمر منكم... دي مش ضيافة. حماتي قالت بعصبية يعني هتطردينا؟! رديت بمنتهى الهدوء أيوه. اتصدمت. إيه؟ هطردكم من شقتي، وأهو أحسن ما أقولهاش بطريقة تانية. طاهر مسك دراعي زهرة، كفاية. سحبت إيدي منه إنت بالذات ملكش حق تقولي كفاية.

وبصيت ناحية الضيوف أنا آسفة يا جماعة، بس الحفلة دي اتعملت من غير علمي في بيتي، وعشان كده ياريت كل واحد ياخد حاجته ويتفضل. الناس بدأت تبص لبعضها في إحراج. واحدة من الستات قامت وقالت إحنا والله ما كنا نعرف. وأنا مصدقاكي، وعشان كده مش زعلانة منكم. بدأوا يلموا حاجتهم واحدة ورا التانية. سيف فضل واقف مكانه، باصص لطاهر. قربت منه ونزلت لمستواه يا سيف، عيد ميلادك حلو، ومش ذنبك أي حاجة حصلت.

الولد بص لي بحزن بس أنا كنت مبسوط هنا. ابتسمت له رغم وجعي وأنا كمان كنت مبسوطة هنا زمان. وبعدين بصيت لطاهر بس من النهارده كل واحد يعيش في بيته. نهى وقفت جنب ابنها، وبصت لطاهر وقالت يلا يا طاهر. طاهر ما اتحركش. نهى، خدي سيف وروحي. بصيت له وقلت لا، هما يخرجوا كلهم. حماتي صرخت إنتي بتطردي ابنك ومراته؟! ضحكت أنا بطرد أي حد موجود في شقتي من غير إذني.